Ruskever
Stormen «Tor» feide innover kysten den 29. januar. Som avis har vi eit særleg informasjonsansvar når det bles opp til uver. Vi laga saker om korleis folk skulle førebu til stormen, rapporterte fortløpande om skader undervegs og kva folk skulle passe på. Vi kommuniserte kontinuerleg med lesarane gjennom direktebloggen på smp.no, ved å svare på spørsmål, legge ut bilder og fortelle om lause veggplater og båtar som hadde slite seg. Informasjonen gjekk begge vegar; lesarane delte sine observasjonar, bilde, videosnuttar og fortalde om sine opplevingar. På denne måten skapte vi eit digitalt fellesskap denne stormnatta som var svært verdifullt.
I dagane etterpå intervjua vi menneska som hadde blitt råka, analyserte skadeomfanget og undersøkte kvifor naudnettet ikkje fungerte som det skulle. Nyhendedekninga av «Tor» er eit døme på godt samspel mellom nett, mobil og papir.
Det har også storma i næringslivet i nordvest, med krise, omstilling og oppseiingar. Alle dei maritime reiarlaga på Sunnmøre har jobba beinhardt for å unngå skifteretten. Nokon har klart det. Andre er framleis ikkje i mål. Vi har lagt vekt på å følge denne utviklinga tett. Store verdiar står på spel, og det handlar om arbeidsplassane til lesarane våre.
Bonusmillionane
Gjennom systematisk jobbing i over eitt år med å få innsyn i ulike dokument, kunne Sunnmørsposten dokumentere at minst 44 millionar kroner hadde blitt sett av til bonusordningar i samband med bygging av St. Olavs Hospital. Desse ordningane vart halde hemmelege på ulovleg vis, og det vart avdekka ein ukultur. Sakene har ført til full opprydding, og leiarlønningane i Helse Midt skal heretter følgje statlege retningsliner. Prosjektet «De hemmelige bonusmillionene» vart nominert i grave-klassa i Nordic Data Journalism Awards 2017.
Forureining
Plastforureining i havet er eit stort samfunnsproblem. Vi har skrive om forskarar som slår alarm, og lage reportasje om fuglefjellet på Runde der fuglane byggjer seg reir av fiskegarn og plastsøppel. Bildet av ei havsule som heng livlaus utanfor kanten av reiret, kvelt i resten av fiskegarn, viser alvoret. Fibrane i fiskegarn er blitt sterkare og betre, og i følgje dei som produserer garnet tek det minst 20 år å bryte det ned. På djupt vatn kan tapte fiskegarn bli ståande i årevis,og forårsake stor skade. Aller farlegast er den giftige mikroplasten, som blir ete av plakton og flytter seg oppover i verdikjeda til fisk og menneske.
Datajournalistikk og visualisering
Reportasjen «Typisk Ålesund» er basert på analyse av data frå dei ulike bydelane i Ålesund, og er ei uhøgtideleg levekårsundersøking. Kva kjenneteiknar dei ulike bydelane? Kva preger folka som bur der, og korleis vil dei presentere seg sjølve?
«Spjelkavik er et estetisk harryhøl. Her kan folk slappe av, kose seg og bo» fortel kunstnaren Bent Erik Myrvoll, når han skal presentere sin bydel.
I reportasjen, som inkluderer tekst, grafikk, bilder og video frå alle bydelane, blir lesarane kjent med Ålesund på nye måtar.
Fotojournalistikk
Jegarar i nordvest har brukt ein god porsjon humor og kreativitet når dei har laga sine jakthytter. Dette er utgangspunkt for fotoreportasjen «Jeger på post». Vi har møtt jegerane som kan sitte timevis i dei oppfinnsomme hyttene sine og vente på hjorten.
Bilde og video er også viktig når vi blir med ringnotbåten «Fiskeskjær» på makrellfiske. Det er viktig å kunne skildre kvardagen om bord på ein båt, som er arbeidsplassen til mange av lesarane våre.
Vi er også opptatt av å utforske nye mulegheiter, og eit døme på dette er klatreturen opp i verdas høgaste bål med 360 graders kamera.