Der Møre-Nytt kan verte betre er på regionale saker, som utvikinga for sjukehus og høgskule. Og alltid er det forbetringsrom for å finne dei gode historiene som fortel om einskildpersonar eller fleire som yter noko ekstra, som har ein særskild lagnad eller som påverkar samfunnet på ein viktig måte.
Å arbeide på fleire plattformar er ei utfordring for ein liten redaksjon. Då handlar det om å verte meir effektiv i arbeidet ein gjer, utan at det skal gå utover kvaliteten. Det hadde vore ynskjeleg med meir segregering mellom nett og papir, og utfordringa er å finne metodar og måtar å gjere dette på utan at ambisjonane om volum og kvalitet vert senkte.
Møre-Nytt som mediehus er gjennom store omstillingsprosessar. På seks år har avisa gått frå fjortenmedarbeidarar til å vere sju frå 1. juli 2017. Det er særleg på støttefunksjonane det har vorte redusert tal på stillingar. Redaksjon og sal er skjerma.
Den store utfordringa framover er at konkurransen ikkje lenger berre kjem frå lokale aktørar, men frå store globale kjemper. Det er ein relativt ny situasjon for eit lite mediehus som Møre-Nytt, og som krev arbeidsinnsats, kunnskapsinnhenting, kompetansebygging og ikkje minst samarbeid med andre mediehus.
Møre-Nytt sin store styrke er god lesarkontakt. Mediehuset er ein viktig del av Ørsta-samfunnet. Men den posisjonen er ikkje sjølvsagt. Det er ein posisjon som krev at mediehuset gjer seg fortent til å vere der.