Fjuken skal framleis vera den mest lesne avisa i dekningsområdet, både på papir og nett. Ei undersøking i fjor synte at vi var større enn for eksempel VG, Nrk og regionavisa GD på nett - i ottadalskommunane.
Fjuken skal framleis spegle lokalsamfunna, både på godt og vondt. Vi har eit like stort ansvar for å syne fram dei positive sidene ved bygdene våre som dei negative.
Fjuken skal gjeva lesarane opplevingar dei ikkje får andre stader. Med fleire andre medie i same dekningsområdet, er det konkurranse om å vera fyrst ute med nyheiter. Her meiner vi sjølve at vi er nokså kjappe og er eit nyheitsmedium på nett. Alle sakene er også delt på Facebook, og mykje av trafikken kjem derifrå.
Nettannonseringa er aukande, og det er å håpe at dette vil halde fram. Samla sett har ikkje 2016 vore eit dårleg annonseår.
Vi lagar tre magasin i året, i tillegg til store aviser til jul og påske. Magasina blir distribuert til hytteeigarar og elles til alle husstandar i Ottadalen.
Med eit nytt redaksjonelt system og nye system på abonnement og annonser - og samproduksjon med dei andre «Skjåk-avisene» går vi eit spennande 2017 i møte.
Rekruttering av nye lesarar blir den største utfordringa, noko som heng nøye saman med innhaldet - at folk finn Fjuken verd å lesa.
Vi trur ikkje at dei andre redigerte mediene er den største konkurrenten, truleg heller ikkje dei sosiale media - det er kanskje i større grad at folk ikkje les i det heile teke.
Vi må difor heile tida arbeide for at nettopp Fjuken skal vera verdfull for ottadølane. Det dei får i Fjuken, får dei berre der - og dei berre MÅ ha det.