Kommunestruktur
Den største politiske saken i Fjordingen sitt dekningsområde siste året har handla om kommunestruktur og delvis regionstruktur. Ved inngangen til 2016 gjekk ordførarane i Stryn, Hornindal, Volda og Ørsta breitt ut for å vurdere samanslåing av alle fire kommunane. Ørsta hoppa raskt av, men fram mot avgjerande vedtak i kommunane reiste ordførarane i Stryn, Hornindal og Volda på felles folkemøte, med det mål å selje inn ein felles kommune over eksisterande fylkesgrense.
Folkerøysting og innbyggjarundersøking i Stryn gjorde det klart at det store fleirtalet av innbyggjarane sa nei til samanslåing med Volda. Dei fleste i Stryn ønskte samanslåing berre med Hornindal.
Dermed sat Hornindal att med heile jokeren, der kommuenn kunne velje å så seg saman med anten Volda eller Stryn.
Kommunestyret valde, trass fleire oppmodingar om folkerøysting, å støtte seg til innbyggjarundersøkinga som viste at dei som hadde svart, var delt på midten i synet om å slå seg saman med Volda ellre Stryn. Med røystene frå Høgre, Ap og Venstre vedtok Hornindal kommunestyre å slå seg saman med Volda. Senterpartiet røysta mot. Dermed vert Stryn ståande åleine, medan Hornindal vert del av Møre og Romsdal.
I skrivande stund er det mykje som tyder på at Stryn og Hornindal, som er Fjordingens ine to kommunar, vert liggjande i kvar sin region etter at regjeringa teiknar nytt regionkart. Men dette vert klart først eit godt stykke inn i 2017.
Kommunedebatten skapte stort engasjement blant innbyggjarane særleg i Hornindal, men og i Stryn. Lesarbrevspaltene var sterkt prega av kommunedebatt i lang tid, både før og etter dei endelege kommunestyrevedtaka.
Reiseliv
Turisme og reiseliv er ei stor næring i indre Nordfjord. Det største enkeltståande byggjeprosjektet innan reiseliv i indre Nordfjord nokon gong er i ferd med å bli realisert gjennom gondolbana Hoven Loen med restaurantbygg oppe på fjellet, 1000 m.o.h. og med eit omfattande nettverk av stiar på fjellet som del av prosjektet. Ei satsing som totlat beløper seg til ca 270 millionar kroner skal bidra til å løfte turismen endå mange hakk i indre Nordfjord.
På tampen av 2016 vart Skålabu, ei sikringshytte ved sidan av Skålatårnet 1848 meter over havet, ferdig. Dette gjer Skåla endå meir attraktiv som heilårs turistmål.
Helse
Manglande avklaring mellom helseføretaka gjorde lenge at pasientar frå indre Nordfjord måtte bryte regelverket for å nytte seg av næraste akuttsjukehus som ligg i Volda. Etter at akuttberedskapen vart avvikla ved Nordfjord sjukehus er Førde sentralsjukehus akuttsjukehuset for heile fylket. Men etter opninga av Kvivsvegen i 2012 har Volda sjukehus kome betydeleg nærare. I dag er det 25 minutt køyring mellom Hornindal og Volda, medan køyretida Hornindal-Førde er over to timar. Inntrykket er at Volda sjukehus vert meir akseptert som akuttsjukehus i dei tilfelle avstanden til Førde vert vurdert som for lang, og støyen som var mellom helseføretaka har dermed dempa seg.
Avisa som talerør for – og kritisk medspelar til ein positiv utvikling lokalt og regionalt
Temaene kommunestruktur, helsetilbod over fylkesgrensa og reiselivssatsing er berre tre av mange tema der avisa har teke og tek ei aktiv haldning på leiarplass. Vi utfordrar gjerne maktapparatet opp til statsrådnivå for å påverke politiske prosessar i rett retning for regionen vi er ein del av. Det vil vi halde fram med, for på den måten å ha rolla som lim og lupe i eit lokalsamfunn på grensa mellom to fylke, kanskje også mellom to regionar.