2016 har vore eit hektisk og krevjande år for alle tilsette i Fjordabladet. Etter at avisa fekk ny majoritetseigar sommaren 2015, låg det i korta at det ville bli ei etappevis, og total omlegging av drifta av Fjordabladet.

I april 2016 vart dei økonomiske og administrative systema lagt om. Styret i avishuset vedtok tidleg på året å endre frekvens frå tre til to gonger i veka. Frekvensendringa vart gjennomført den 24. mai 2016. Blant tilsette var det knytt spenning til korleis endringa i frekvens ville bli møtt av annonsørar og abonnentar. Etter kort tid kunne Fjordabladet slå fast at endringa i all hovudsak hadde blitt positivt mottatt av både abonnentar og annonsørar. Ein grunn til det hadde truleg samanheng med omfattande informasjon i framkant av frekvensendringa. Dei aller fleste  oppfatta det nok som om dei fekk like mykje lokal journalistikk, på alle plattformer, som det dei hadde fått tidlegare. Skilnaden var at dei no fekk det to gonger i veka på papir og eavis, samt meir omfattande oppdatering av nyheitssaker på fjordabladet.no. 

Dei største skeptikarane spådde at Fjordabladet ville miste abonnentar, og kanskje også annonsørar, i samband med frekvensendringa. Det er gledeleg å konstatere at det var det motsette som skjedde. I løpet av hausten 2016 hadde avisa på det meste rundt hundre fleire abonnentar, enn den hadde før frekvensendringa. Ved utgangen av året kunne vi også konstatere at annonseinntektene , som var identisk med lokale annonseinntekter i 2015, var rundt åtte prosent høgare i 2016 enn året før.